Соработката со СОС Детското село Македонија беше операционализирана во три последователни активности. Имено, за персоналот на СОС Детското село беа ангажирани експерти психолози од МАПП за подготовка и реализација на обука за Психосоцијална поддршка на ранлива категорија на бегалци. Обуката беше реализирана во периодот од 11 до 15 август 2017 година. Членките на МАПП исто така подготвија и Прирачник со методологија за долгорочна интервенција и работа со ризични категории граѓани и маргинализирани лица, изработен пред започнувањето со предвидената обука. Обуката беше наменета за вработени од психосоцијални профили и професии кои беа обучувани да работат со различни типови на маргинализирани групи и социјално загрозени категории на граѓани – деца, мајки, деца без придружба итн, како и луѓе со пост-трауматичен стрес од било каква непогода.

Оваа соработка продолжи со испорачување обука за справување со стресот (стерс менаџмент) во два наврати – во периодот од 24 до 27 август 2017 година за вработените на Проектот за интервентна поддршка, што се реализираше во Охрид и подоцна во периодот од 20 до 21 септември 2017 година за вработените во Националната канцеларија на СОС Детско село Македонија. Обуките опфаќаат лични и организациски фактори на стрес, пронаоѓање начин за афирмација на себеси и другите и оптимално ефектуирање на тимот во организациски услови. Понатаму обуките разработуваа справување со различни емоции поврзани со несигурност и одржливост на невладиниот сектор и тоа обработка преку освестување, препознавање и манифестирање на сите емоции и однесувања, нивно процесирање и пронаоѓање начин за нивна трансформација во позитивни  и конструктивни организациски процеси. Еден дел од сесиите беше посветен на техники и начини како да се направи адекватна организација на времето и обврските, како да се постават приоритетите, а сѐ во прилог на превенција од стрес поради недостиг на време или нереализирани активности.